23 marsi i vitit 1923 shënon themelimin e klubit të Flamurtarit, një prej skuadrave më të vjetra e me më shumë traditë në futbollin shqiptar. Për një shekull në klubin vlonjat u angazhuan emra të shquar të futbollit shqiptar.
Në edicionin 1987-88 në UEFA Cup, kuqezinjtë ishin pjesë e gjashtëmbëdhjetë skuadrave më të mira. Skuadra kuqezi eliminoi në turin e parë Partizanin e Beogradit (2-0 në Vlorë dhe 1-2), në turin e dytë skuadrën gjermano-lindore Vismut-Aue (0-1 dhe 2-0 në Vlorë) për t’u ndaluar në turin e tretë nga Barcelona.
Në “Camp Nou” erdhi humbja 4-1, ndërkohë që sfida e kthimit solli fitoren e bujshme dhe të paharrueshme të vlonjatëve, 1-0 me golin e Sokol Kushtës.
Lexo edhe:
- Nga Messi te Skriniar, kontratat e yjeve të futbollit që skadojnë në verë
- “Blindohet” Napoli, Italia në alarm për huliganët anglez
- Nisin eliminatoret e EURO 2024, ndeshjet që mund të ndiqni në “SuperSport”
- Flet trajneri: Prenga një bishë, synon të pushtojë botën
Flamurtari, ishte përballur dhe në sezonin 1986-1987 me katalanasit. Spanjollët u kualifikuan vetëm falë golit në fushën kundërshtare, pas dy barazimeve 1-1 dhe 0-0 në “Camp Nou”.
Sokol Kushta ishte lojtari i cili asokohe mahniste Europën me paraqitjet e tij fantastike, por jo vetëm. Pjesë e Flamurtarit legjendar ishin edhe emra si Vasil Ruçi, Petro Ruçi, Alfred Ferko, Rrapo Taho, Kreshnik Çipi apo Latif Gjondeda.
Skuadra vlonjate ka fituar titullin kampion në sezonin 1990/1991, ndërsa numëron dhe 4 Kupa Shqipërie. Aktualisht skuadra historike shqiptare nuk ndodhet aty ku duan tifozët vlonjatë.
Flamurtari po garon në Kategorinë e Parë me synimin kryesor: rikthimin në elitën e futbollit shqiptar, aty ku e meriton të jetë.
