Ashtu siç ishte paralajmëruar një ditë më parë, sporti i basketbollit bëri hapin e parë drejt ribashkimit të Shqipërisë me Kosovën, pasi federatat e dy vendeve firmosën sot për krijimin e një lige të përbashkët, që do të quhet Liga Unike.
Në një ceremoni të mbajtur në Tiranë, Presidenti i Federatës së Basketbollit në Shqipëri, Avni Ponari dhe presidenti i Federatës së Basketbollit në Kosovë, Arben Fetahu, firmosën për këtë hap të ri në prani të ministrave përkatës të sportit dhe kryeministrit shqiptar Edi Rama.
Gjithçka nisi gjatë paradites së sotme, ku u formua bordi i Ligës Unike, me anëtarë Shaqir Totaj, Edmond Biqoku, Elvira Dushku, Korab Llazani, dhe kryetar Ilir Trebickën, një emër i njohur i basketbollit shqiptar ndër vite.
Më pas bordi zgjodhi edhe drejtuesin e Ligës Unike, që do të jetë Dren Zatriqi, kurse Sekretar Teknik është zgjedhur Fidan Hamiti. Ndërkohë Zyrtari i Marketingut do të jetë Dren Hasangjekaj, kurse Zyrtare e Financave, Nadire Kajashi.
Në Ligën Unike do të marrin pjesë 8 skuadra, 4 më të mirat e Shqipërisë dhe 4 më të mirat e Kosovës, ndërsa krijimi i saj pritet të rritë ndjeshëm edhe interesin për sportin e basketbollit.
Mbledhja e radhës e bordit të Ligës Unike pritet të mbahet në Prishtinë, ku do të diskutohen edhe detaje të tjera si data e fillimit të kampionatit të përbashkët, por edhe kalendari etj.
Basketbolli bëhet kështu nismëtar i bashkimit mes Shqipërisë dhe Kosovës, duke ua kaluar të gjithë sporteve të tjera, por edhe politikës së të dy krahëve, që ka bërë shumë pak në këtë drejtim.
