Jose Mourinho nuk është nga ata trajnerë që mund të marrë me të mira një futbollist. Portugezi njihet për sjelljen e drejtpërdrejtë me lojtarët, ndërsa në shumë raste nuk ia ka përtuar atyre edhe kritikat publike. Së fundmi, ish-futbollisti i Manchester United, Angel Gomes ka zbuluar se Mourinho e kritikoi para të gjithë skuadrës dhe se në atë moment ai ishte gati në lot pasi nuk mundi të duronte fjalët e 59-vjeçarit.
“Nuk e kam treguar më parë këtë histori, por njëherë Mourinho më grumbulloi me ekipin e parë për një ndeshje të Kupës. Ishim në tavolinë duke ngrënë darkë dhe ai thjesht erdhi aty duke më bërtitur. Më tha se ishte i lodhur nga unë, këmbëngulte se në fushë nuk kisha bërë atë që më kishte kërkuar.
Por, fjalët ishin të rëndë dhe ishin para së gjithë skuadrës. Unë nuk e prisja një reagim të tillë, u struka në vendin tim dhe disa nga shokët u afruan për të më ngritur humorin madje më thanë se Mourinho ishte thjesht duke më provokuar. Isha shumë i ri dhe mendoja se Mourinho më urrente, shkova menjëherë në dhomën time dhe i telefonova babait, isha gati duke qarë”, u shpreh Gomes.
Tashmë, 21-vjeçari është pjesë e Lille në Francë ndërsa sezonin e fundit e mbylli në huazim te Boavista, ndërsa së fundmi mesfushori me tipare sulmuese thekson se e kupton Mourinhon ndërsa shton se portugezi kërkon vetëm t’iu japë një mesazh të qartë të rinjve se nuk mund të bëjnë qejf në një skuadër.