Pushimet pas humbjes ndaj Mainz me rezultatin 3-1, një pjesë e skuadrës së Bayern zgjodhi t’i kalonte duke festuar në Ibiza. Ky episod bëri që trajneri i kampionëve të Gjermanisë, Julian Nagelsmann të kritikohej ashpër nga shumë persona, përfshirë këtu edhe legjendën e klubit, Lothar Matthaus, që i kishte lënë të largoheshin pas disfatës.
Duke folur në konferencën për mediet përpara ndeshjes me Stuttgart, që do zhvillohet këtë të dielë në “Allianz Arena”, tekniku theksoi se ai nuk është babai i lojtarëve që t’i ndalojë.
“Drejtori sportiv, Hasan Salihamidzic, shpjegoi gjithçka. Unë jam përgjegjës për skuadrën time dhe bëra atë që mendova se ishte e drejtë, duke planifikuar dy ditë pushim. Lojtarët janë të rritur mjaftueshëm, unë nuk jam babai apo mësuesi i tyre. Nëse vendosin të bëjnë diçka të tillë në grup, vendosin ata. Lojtarët mund t’i përdorin ditët e pushim siç ta dëshirojnë.”-deklaroi tekniku.
Në këtë mënyrë ai iu kundërpërgjigj kritikëve, duke iu theksuar se cili është roli i tij në skuadër dhe te lojtarët.
