Nuk ka më asnjë dyshim, edhe analizat e testit B kanë konfirmuar përdorinimin e substancës së ndaluar, meldonium, nga atleti rus i curling, Aleksander Krushelnitckii. Vetëm pak ditë më parë, Krushelnitckii mori medaljen e bronztë në Lojërat Olimpike dimërore “Pyeongchang 2018” në lojën dyshe-mikse, ku garon bashkë me bashkëshorten e tij.
Në orët e fundit është konfirmuar gjithashtu se edhe lojtari i Kombëtares së Sllovenisë në hokej, Ziga Jeglic, ka përdorur substancën e ndaluar fenoterol. Jeglic është pezulluar nga garat dhe është urdhëruar që brenda 24 orëve të largohet nga Fshati Olimpik, deri në një vendim të dytë, kur të merren edhe analizat e testit B. Një vendim përfundimtar për të dy rastet do të merret pas përfundimit të Olimpiadës.