Në IPKO Superligën e Kosovës nuk ka kohë për relaks. Këtë të shtunë nis java e 14-të me 3 sfida shumë interesante, dy prej të cilave do të transmetohen në ekranin e Supersport. Pas fitores surprizuese në mesjava ndaj Llapit në transfertë sot në orën 13:30, Ballkani pret në shtëpi kryesuesit e Feronikelit dhe do të tentojë një tjetër rezultat pozitiv. Skuadra nga Drenasi nga ana tjetër nëse dëshiron të fitojë titullin nuk mund të gabojë kurrësesi pasi Prishtina është shumë pranë dhe është gatshme të përfitojë nga çdo hap fals i Feronikelit. Por kryeqytetasit e Mirel Josës sot do të kenë një sfidë akoma më të vështirë në letër pasi luajnë në transfertë ndaj Drenicës. Megjithatë Prishtina po kalon një moment shumë të mirë dhe është favorite për të marrë tre pikët. KEK-u-Flamurtari është sfida tjetër e kësaj fundjave me vendasit që e kanë prerë që tani biletën për në ligën e parë, kështu që kuqezinjtë nga kryeqyteti duhet të bëjnë detyrën sot dhe të marrin tre pikët e radhës.
