Sot në mbrëmje luhen ndeshjet e pesta të fazës së grupeve në Europa League dhe rivaliteti vazhdon të jetë tepër i ashpër për 20 vendet në dispozicion. Kanë garantuar pjesëmarrjen deri tani për në fazën e 1/16 vetëm katër ekipe: Dinamo e Kievit, Steaua, Arsenali dhe Zeniti, ndërkaq të vetmet skuadra të eliminuara janë Makabi i Tel Avivit, Evertoni dhe Vardari i Shkupit. Në Grupin A dy skuadrat kryesuese, Villarreali dhe Astana, do të ndeshen në Kazakistan, takim që do të startojë që në orën 17:00 e që shënon gjithashtu edhe fillimin e sfidave të raundit të parafundit të kësaj faze. Aktualisht, “nëndetësja e verdhë” ka një pikë më shumë në renditje, gjithsesi, në këtë grup shpresa për kualifikim ushqen gjithashtu edhe Slavia e Pragës, që shpreson shumë për të marrë 3 pikët në Tel Aviv kundër Makabit të eliminuar. Në Grupin B, përveç takimit Skënderbeu – Dinamo Kiev, do të zhvillohet në Beograd gjithashtu edhe dueli tjetër Partizani – Young Boys, që pritet të jetë përcaktues për fatin e klubit korçar në këtë grup. Dy skuadrat që ndodhen në skajet e Grupit C, Ludogorets e Baskasehir, do të masin forcat në Bullgari, me klubin nga Razgradi që kërkon 3 pikët për t’u afruar akoma më shumë me kualifikimin për në fazën e “knock out”-it, ndërkaq Hofheneimi duhet patjetër të mundë në Portugali Sporting Bragën, përndryshe klubi gjerman do ta mbyllë që këtë të enjte aventurën e sivjetshme në Kupat e Evropës. Ecuria e Milanit në kampionatin italian është vërtet shumë negative, kështuqë “kuqezinjtë” do të bëjnë çmos për të siguruar pjesëmarrjen në Champions nëpërmjet Europa League-s. Në Grupin D ekipi i Montelës ka mundësi të garantojë kualifikimin mes 32 skuadrave të fazës tjetër nëse mund në stadiumin “Meazza” Austrinë e Vjenës. Tepër i fortë pritet edhe dueli tjetër që do të luhet në Stadiumin Olimpik të Athinës AEK – Rijeka, ku kampionët në fuqi të Kroacisë luajnë shanset e tyre të fundit. Në Grupin E me shumë gjasa do të kalojë për më tej dyshja Atalanta – Lyon, pasi dy klubet kanë plot 5 pikë avantazh kundrejt Apollonit të Limasolit, gjithsesi këtë herë skuadra bergamaske viziton stadiumin “Goodison Park”, ndërsa Lioni do të presë në Francë ekipin qipriot. Në Grupin F Copenhagen-i, Sheriff-i i Tiraspolit dhe Lokomotiva e Moskës ndahen nga vetëm 1 pikë, sidoqoftë këtë radhë kalendari ofron përballjet Lokomotiv – Copenhagen dhe Sheriff me Zlin të Sllovakisë. Steaua, pas kualifikimit kërkon të garantojë edhe vendin e parë të Grupit G, teksa luan jashtë fushe me Viktoria Plzen, ndërsa Lugano do të përballet në Zvicër me Hapoel Beer Shevën. Në Grupin H, Kolni i vendit të fundit pret Arsenalin e kualifikuar, ndërsa takimi tjetër Bate – Crvena Zvezda luhet në “Borisov Arena”, me dy ekipet që ndahen nga thjesht një pikë. Në Grupin I praktikisht ushqejnë shpresa që të katër klubet, kështuqë shumë do të vendoset nga çiftet Konyaspor – Marseille, Salzburg – Vitoria Guimaraes. Edhe në Grupin J katër ekipet ndahen nga vetëm 3 pikë, kështuqë me interes të veçantë priten ndeshjet Ostersund – Zorya Luhansk dhe Athletic Bilbao – Herta Berlin. Lazio është skuadra e vetme që deri tani ka grumbullura 100% të pikëve, madje “bardhekaltrit” kanë siguruar gjithashtu edhe vendin e parë, prandaj ekipi i Simone Inzaghit pritet të bëjë ndryshime të mëdha në “Olimpiko” përballë Vitesses, ndërkaq në Bregun e Kaltër pritet të garantojë kalimin për në fazën tjetër gjithashtu edhe Nisa që do të vihet përballë klubit belg Zulte Waregem. Në Grupin L, që është edhe grupi i fundit i kësaj faze, gjithçka duket e përcaktuar, gjithsesi Zeniti i kualifikuar do të luajë me Vardarin e eliminuar, ndërsa ekipit bask Real Sociedad në Norvegji i mjafton thjesht një pikë ndaj Rosenborgut për të mbyllur llogaritë.
Lazio-Vitesse 19:00 SS3
Koln-Arsenal 19:00 SS4
Golat Direkt 19:00 SS5
Skënderbeu-D. Kiev 21:05 SS2
Milan-Austria Wien 21:05 SS3
Everton-Atalanta 21:05 SS4