Kualifikimi i Algjerisë për në gjysmëfinalet e Kupës së Afrikës, ardhur pas goditjes së penalltive kundër Bregut të Fildishtë, shkaktoi një valë të gjatë festimesh nga tifozët e kësaj kombëtareje.
Kjo nuk ndodhi vetëm në shtëpi, por edhe në Francë, në Paris në veçanti, që mbrëmjen e djeshme u pushtua nga makinat me bori të takuara, apo në zona të caktuara u ngjyros në të bardhë dhe të gjelbër. Fatkeqësisht, kjo lloj feste u njollos edhe nga huliganizmi e një aksident fatal.
Kështu, në Montpellier, një tifoz algjerian humbi kontrollin e veturës dhe përplasi një familje, duke lënë të vdekur nënën dhe plagosur rëndë dy fëmijët e saj të mitur, që ndodhen të shtruar në spital.
Edhe një fëmijë tjetër u përfshi në këtë aksident, i plagosur rëndë. Në Paris, lagjja Barbès, ku jeton një komunitet i madh algjerian, u bllokua totalisht nga trafiku. Shumë tifozë dolën me makina në “Champs Elysees”, ku gjatë natës pati disa individë, që shfrytëzuan kaosin festiv për të shkatërruar e vjedhur disa dyqane.
Në fund, turma e tifozëve në Paris, ashtu si në Marseille, u shpërnda vetëm pas ndërhyrjes së fortë të policisë. Bilanci i festimeve ishte: 30 tifozë të ndaluar dhe 20 agjentë policorë të lënduar.