Goglat vendosën Juventusin përballë Freiburgut në raundin e 1/8-ve në Europa League. Koordinatori i stafit të bardhezinjve, Gianluca Pessotto komentoi shortin përballë skuadrës gjermane.
“Do të jenë dy ndeshje të bukura kundër një ekipi të fortë. Ata po ecin shumë mirë në Bundesliga, ndërkohë që vijnë në këtë raund të pathyeshëm.
Mos të harrojmë që fituan grupin, kishin edhe Nantes në grup. Duhet të jemi shumë të vëmendshëm ndaj Freiburgut, por jemi gati”, deklaroi ish-mbrojtësi italian.
“Këtë vit Juventusi duhet të bëjë gjithçka për të fituar Europa League dhe Kupën e Italisë”, u shpreh Pessotto.
Skuadra e Max Allegrit luan takimin e parë ndaj Freiburgut në Torino (9 mars). Përballja e kthimit do të zhvillohet një javë më vonë në “Europa-Park Stadion”.