Skuadra e Kukësit u dha fund përgatitjeve në Antalia të Turqisë, për t’u kthyer në Shqipëri në orët e vona të mbrëmjes. Ekipi verilindor qëndroi thuajse për dy javë në tokën turke, ku përtej angazhimit me ngarkesë të lartë fizike në stërvitje zhvilloi edhe tri ndeshje miqësore, duke marrë rezultate mjaft domethënëse përballë kundërshtarëve me buxhet ndjeshëm më të lartë.
Kështu skuadra e Cungut në testin e parë u mposht 2-1 nga ekipi që kryeson renditjen në Superligën e Turqisë, Istanbul Basaksehir, në miqësoren e dytë barazoi 1-1 me rusët e Rostovit për ta mbyllur me një fitore të bukur 2-0 me Shaktar Karagandy-n e Kazakistanit.
Sa i përket merkatos, në Turqi u zyrtarizua afrimi i Faton Xhemailit, ndërsa më parë Kukësi kishte siguruar shërbimet e Eduard Rrocës dhe Vasil Shkurtajt, dy ish-lojtarë të Luftëtarit.
