Kukësi rikthehet në “Zeqir Ymeri”. Në fakt, jo për ndeshjet zyrtare, por për një miqësore me skuadrën nga Kosova, Liria e Prizrenit. Klubi verilindor, nëpërmjet një njoftimi në faqen zyrtare, fton të gjithë tifozët në stadium për të ndjekur këtë takim, ku hyrja do të jetë falas.
“Skuadra e Futboll Klub Kukësit, më datë 16 nëntor 2018, ora 14:00, do të zhvillojë ndeshje miqësore me skuadrën e Lirisë së Prizrenit.
Rreth një vit më parë, në ndeshjen e parë miqësore, Liria e Prizrenit – Kukësi, këta dy ekipe u ndanë në barazim, ku skuadrat arritën të shënonin nga 3 gola.
Rikthehemi pas një periudhe të gjatë në “Zeqir Ymeri” dhe u bëjmë thirrje të gjithë sportdashësve, në veçanti tifozëve kuksianë, të mbështesin skuadrën e zemrës, pasi hyrja në stadium do të jetë pa pagesë.
Shpresojmë që shumë shpejt të arrijmë të zhvillojmë të gjitha ndeshjet e Kategorisë Superiore, Kupës së Shqipërisë si dhe ato të arenës ndërkombëtare në stadiumin e qytetit, tonë pasi deri tani ka ndikuar shumë negativisht në vazhdimësinë e ekipit, duke mos u dhënë tifozëve mundësinë e mbështetjes së drejtpërdrejtë për skuadrën.”