Koha e eksperimenteve, përgatitjeve, takimeve testuese ka përfunduar, tashmë ka ardhur momenti i dueleve të vërtetë. Fundi i 2018-ës ishte i bekuar për Kukësin, 4 fitore dhe një barazim e rikthyen këtë skuadër mes pretendentëve kryesorë. Merkatoja e dimrit largoi një futbollist cilësor si Shkodra, por afroi 2 të tjerë, të aftë për të dërguar një skuadër te fitorja, Vasil Shkurtajn dhe Rrocën.
Prova e përgjithshme nuk shkoi edhe aq mirë, blutë u dorëzuan në takimin e parë të raundit të 1/8-ave në Kupë kundër Apolonisë. Mund të jetë një sinjal alarmi, edhe pse i zbehtë, gjithsesi provimi i pjekurisë do të jetë pikërisht sfida ndaj Laçit për të parë nëse ndërhyrjet në merkaton e dimrit i kanë shtuar forcën kësaj skuadre apo koha e përshtatjes do të jetë elementi negativ i nënkampionëve.
Testi kryesor në prag të rifillimit të sezonit dha rezultate zhgënjyese edhe për bardhezinjtë. Disfata në Kupën kundër Bylisit ishte ndoshta befasia më e madhe e mesjavë. Trajneri Prenga, në fund të fazës së dytë, u rikujtoi disa herë drejtuesve që duhen forca të reja. Ka pasur lëvizje në hyrje, por jo goditje të merkatos. Kukësi dhe Laçi kanë një histori përplasjesh të ashpra vitet e fundit, aq sa kjo sfidë ka marrë përmasat e një derbi për mënyrën sesi lojtarët e kanë përballuar psikologjikisht dhe ndeshja e radhës pritet të jetë në të njëjtën kornizë të zjarrtë.