Kukësi kundër Flamurtarit nuk na emocionoi me lojën e treguar, përkundrazi pati momente kur më shumë të tërhiqte futbolli i kuqezinjve, që janë në vendin e fundit, sesa ai i bluve, megjithatë rezultati është “mbreti” i futbollit dhe në fund e drejta u takon nënkampionëve, që morën maksimumin e pikëve.
Absolutisht për justifikim, por lojtarët, që për arsye të ndryshme nuk zbritën në fushë, kanë jo pak ndikimin në mënyrën se si skuadra luan, mbi të gjitha Limaj e Shkurtaj.
Problemi është se këtë fundjavë Kukësi do të përballet në transfertë me skuadrën më në formë të momentit, Laçin, dhe Limajt e Shkurtajt në infermieri u është bashkuar edhe Kristal Abazaj. Anësori u dëmtua në fillimin e takimit kundër Flamurtarit dhe pas ekzaminimeve janë evidentuar shembje me hematomë në zonën lombare. Nëse gjithçka shkon sipas parashikimeve, gjasat janë që 23-vjeçari të rikthehet pas ndërprerjes së kampionatit për shkak të ndeshjeve të kombëtares.
Sa i përket autorit të 7 golave në kampionat, Shkurtajt, dëmtimi muskulor nuk është i një shkallë të rëndë, por ende nuk dihet nëse ai do të jetë apo jo i gatshëm për të dielën. E njëjta situatë edhe për Vesel Limajn.
Janë 3 lojtarë që ndikojnë, pa diskutim, në mënyrën sesi Duro do ta ndërtojë formacionin dhe të shkosh në Laç pa 3 elementë kryesorë të shkakton një migrenë të lehtë.
