Pas një tjetër sezoni pa Europë, Kukësi po përgatit një revolucion në ekip, teksa gjithçka nisi me ndryshimin në pankinë, ku u shkarkua Diego Longo dhe projekti i të ardhmes iu besua të mirënjohurit Skënder Gega.
Ndryshime të mëdha priten edhe në organikë, teksa pas largimit zyrtarisht të Emiliano Mustës dhe Ardit Hilës, klubi verilindor ka njoftuar divorcin edhe me veteranin spanjoll Pablo De Lucas.
Ky i fundit erdhi te Kukësi me kërkesë të Diego Longos dhe ishte një nga pikat më të forta të formacionit të verilindorëve në sezonin që lamë pas, megjithatë palët vendosën që të mos rinovojnë kontratën që skadoi pikërisht më 31 maj.
“FK Kukësi njofton se pas bisedimeve me mesfushorin spanjoll Pablo De Lucas, është vendosur të ndërpritet bashkëpunimi mes palëve. Kontrata e futbollistit përfundoi me fundin e sezonit dhe palët vendosën të mos rinovojnë.
FK Kukësi e falënderon mesfushorin De Lucas dhe i uron suksese në karrierën e tij. Gracias Pablo”, shkroi klubi verilindor në faqen zyrtare.