Kombetare

“Kuqezinjtë” e Serisë A projektohen titullarë

Pritet një fundjavë pozitive për futbollistët e kombëtares shqiptare që luajnë me skuadrat e Serisë A. Në formacionet paraprake të javës së 8-të të kampionatit Italian të gjithë “kuqezinjtë” konsiderohen pjesë e formacionit titullar. Sigurisht që për dy portierët, Etrit Berishën e Atalantës dhe Thomas Strakoshën e Lazios e sigurisht edhe për Hysajn e Napolit, do të përbënte lajm nëse nuk preferohen që nga minuta e parë.

Arlind Ajeti, i cili nuk u aktivizua nga Panucci në takimin me Italinë në “Loro Borici”, rreshtohet në formacionin paraprak të Crotones, në përballjen e shtëpisë ndaj Torinos. Edhe Berat Gjimshiti apo Ledian Memushaj konsiderohen titullarë te Benevento në transfertë me Veronën. Bëhet fjalë vetëm për formacionet paraprake, pasi mund të ketë ndryshime në seancat e fundit stërvitore. 6 futbollistë kuqezi titullarë në Serinë A do të ishte një lajm shumë i mirë për trajnerin Panucci, i cili edhe në konferencën për shtyp një ditë pas humbjes me Italinë u shpreh se problemi kryesor i futbollistëve shqiptarë është aktivizimi i paktë te skuadrat e tyre.

To Top