Etrit Berisha është rikthyer të bëjë protagonistin me Torinon në Serie A, teksa në ndeshjen e fundjavës ai që e pësoi ishte Lorenzo Insigne. Sulmuesi i të kaltërvëe mori përsipër ekzekutimin e një penalltie, mirëpo u ndal nga portieri i kombëtares shqiptare i cili kuptoi krahun dhe mbajti të paprekur rrjetën e tij.
Në fund, Torino dhe Berisha ishin të pafat pasi u mposhtën pas një realizimi të Fabian Ruiz i cili shënoi golin me vlerën e tre pikëve për Napolin. Megjithatë, vlerësimet për Berishën ishin tejet pozitive ndërsa portieri i kombëtares është bërë pjesë edhe e formacionit të javës.
Mirëpo, nuk është vetëm Berisha që përfaqëson Shqipërinë në formacionin e më të mirëve në Itali, teksa edhe Berat Gjimshiti ishte protagonist te Atalanta. Mbrojtësi ia doli të gjente rrugën e rrjetës në sfidën e fituar 1-3 ndaj Spezias ndërsa konfirmohet si një nga lojtarët kryesorë të Atalantës. Në këtë formacion, dyshja shqiptare rreshtohet përkrah emrave si Tonali, Lautaro Martinez e Leao.