Një Kylian Mbappe mostruoz i dha një fitore të çmendur PSG-së përballë Lyonit në “Parc des Princes”. 5-0 fituan kampionët në fuqi të Francës, ku 4 golat e fundit u shënuan nga adoleshenti i mrekullueshëm francez brenda 13 minutave lojë. Diçka e pazakontë në një sfidë në fakt të pazakontë, pasi të dyja skuadra luajtën gjatë gjithë pjesës së dytë me nga 10 lojtarë.
Neymar zhbllokoi takimin që në minutën e 9-të me 11-metërsh, por në të 32-ën Kimpembe ndëshkohet me karton të kuq, duke u hapur telashe vendasve. Gjithsesi. Në fundin e pjesës së parë forcat në fushë u barazuan, pasi edhe Tousart i Lyonit u ndëshkuar ma kartonin e dytë të verdhë e për rrjedhojë me të kuq.
Në pjesën e dytë erdhi momenti sureal i Mbappesë, që mundi për një kohë mjaft të shkurtër, vetëm brenda 13 minutave të realizonte plot 4 gola, të gjithë brenda zonës. PSG po luan një kampionat më vete në Francë, pasi kryeson Ligue më 27 pikë në 9 ndeshje, pra me pikë të plota.
