Rifillimi i kampionatit i pa në vështirësi serioze si Skënderbeun ashtu edhe Laçin, pavarësisht se kurbinasit morën atë që deshën ndaj Kukësit. Kampionët u shfaqën të brishtë ndaj Partizanit, ndërkohë që “Thembra e Akilit” për Laçin vijon të jetë sulmi, pasi ndaj verilindorëve rastet për shënim nuk munguan.
Për të rregulluar disi humorin e trajnerëve Orges Shehi dhe Besnik Prenga mendojnë drejtuesit me lëvizjet e tyre në merkato. Kampionët kanë të gatshëm për sfidën me Kastriotin edhe dy afrimet e tjera, Elmir Asani dhe Idriz Toskic, të cilëve u ka mbërritur federimi dhe do të japin kontributin e tyre për skuadrën.
Ajo që tashmë duhet të vlerësojë timonieri i bardhekuqve është gjendja e tyre fizike, duke shpresuar që të kenë të njëjtin impakt si Shqiprim Taipi në 45 minutat e dyta ndaj Partizanit.
Te Laçi mund të buzëqeshin përgjysmë, Malick Mane dhe Antony Okpotu janë tashmë zyrtarisht bardhezi, pasi ka mbërritur federimi i tyre, por ende nuk mund të jenë fizikisht gati. Senegalezi dhe nigeriani duhet të pajisen me vizë hyrëse për në Shqipëri dhe më pas mund të bashkohen me grupin nën urdhërat e trajnerit Besnik Prenga.
Kurbinasit do të kthehen të luajnë në shtëpi përballë luftëtarit dhe ndoshta gjendja e kundërshtarit mund të bëjë që prania e dy afrimeve të reja të mos ndihet shumë. Por Mane dhe Okpotu priten në Laç me padurim, pasi vlerësohen si zgjidhja e vetme e “halleve” të kurbinasve në rrugën drejt golit.
Me këto federime Skëmnderbeu dhe Laci gjejnë “ilaçin” për zgjidhjen e problemeve të hasura në dy fazat e para.