Paraqitja e Laçit në Europa League në duelin e dyfishtë me Hapoel Beer Sheva la një shije të mirë jo vetëm te drejtuesit e klubit, por edhe te të gjithë ata që ndoqën sfidat e bardhezijve. Kurbinasit treguan kompaktësi në lojë dhe ndoshta me më shumë fat mund të shkaktonin surprizën e madhe.
Të eliminuar nga një gol i vetëm, Laçi ka fituar besim në këtë prag sezoni, aq sa, pa frikë, edicionin e ri e nis me pretendime të mëdha. Sigurisht që titulli është diçka e madhe për bardhezijtë, teksa edhe sezonin e kaluar provuan ta përmendin fjalën titull, duke rrëshqitur më pas në klasifikim.
Megjithatë, duke parë situatën në të cilën gjenden klubet e tjera të Superiores, por mbi të gjitha me besimin e fituar te forcat e veta, formacioni i drejtuar nga Sulejman Starova zbret sezonin e ri si një skuadër për t’u mundur. Solid në mbrojtje dhe vrasës në sulm, edhe pse në repartin e avancuar drejtuesit e klubit nuk po gjejnë ende njeriun e duhur, çka i mungon skuadrës që nga largimi i Reginaldos.
Përveç moshës së re dhe cilësisë që disponon kjo skuadër, ka avantazhin se mund të paraqitet në fushë si një kameleon, e aftë të ndryshojë në varësi të situatës dhe kundërshtarit që ka përballë. Me 3 apo 4 në mbrojtje, nuk është aspak problem, pasi këta djem kanë dëshirën e madhe për të sakrifikuar dhe treguar në fushën e lojës që mbi çdo gjë vlen skuadra.
Laçi i sezonit të ri do të jetë ndryshe, ku minimalisht synohet pjesëmarrja në kompeticionet europiane, pse jo për ta mbyllur edicionin me një trofe.