Pavarësisht se renditja e mban në një pozitë të vështirë, Laçi i këtij sezoni po merr duartrokitjet për lojën e zhvilluar. Një ekip i cunguar në përbërje, me shumë pak futbollistë nën urdhrat e trajnerit Mezani, bardhezinjtë kanë demonstruar një futboll tërheqës. Ndaj kukësit kampion ishte shfaqja e fundit pozitive e një skuadre që luan futboll modern, pavarësisht moshës së re të futbollistëve. Bardhezinjtë në harkun e pak javëve po tregojnë një rritje të jashtëzakonshme në lojë, pavarësisht se i kanë nisur dy ndeshjet e fundit duke pësuar gol që në minutat e para. Ndaj Luftëtarit, në transfertë, iu imponuan kundërshtarit deri në fund, duke arritur t’i merrnin barazimin “in-extremis”. Edhe ndaj Kukësit historia ishte e njëjtë, me Laçin që dominoi në lojë, si asnjëherë tjetër në këto 12 javë. Fatkeqësisht për bardhezinjtë rezultati në fund ishte humbja, edhe pse loja e treguar ka bërë për vetë të gjithë. Ajo që bie në sy është mungesa e eskperiencës te futbollistët e Laçit, ndërkohë që tashmë duhet menduar për rikuperimin fizik në mënyrë që të përballohet me të njëjtin ritëm pjesa e mbetur e sezonit.