Novak Djokovic mund të mbrojë titullin në Wimbledon, pasi organizatorët kanë vendosur që edhe lojtarët të cilët nuk janë vaksinuar kundër Covid-19 do të lejohen të konkurrojnë në këtë turne. 34-vjeçari nuk u lejua të luante në “Australian Open”, në janar, pikërisht për faktin që nuk ishte i vaksinuar.
“Në kriteret e vendosura nga qeveria për të hyrë në Mbretërinë e Bashkuar nuk përfshihet vaksinimi i detyrueshëm,” – tha shefja ekzekutive e “All England Lawn Tennis Club”, Sally Bolton, në një konferencë shtypi. – “Prandaj, nuk është kusht për të hyrë në vend”.
Wimbledoni do të zhvillohet nga 27 qershori deri më 10 korrik. Pas sagës së Noles në “Australian Open”, që përfundoi me deportimin e tij vendi, Djokovic humbi turnetë e tjerë, duke përfshirë “Indian Wells” dhe “Miami” për shkak të rregullave të Koronavirusit për hyrjen në Shtetet e Bashkuara.
Gjatë kësaj periudhe serbi humbi gjithashtu vendin e parë në klasifikimin e përgjithshëm, që e mori rusi Daniil Medvedev. Djokovic arriti në finalen e tij të parë të vitit fundjavën e kaluar, duke humbur ndaj rusit Andrey Rublev në “Serbia Open”, në Beograd.
Djokovic, i cili ka fituar 20 tituj Grand Slam, tha për BBC-në në shkurt se do të preferonte të humbiste trofetë e ardhshëm të tenisit sesa të detyrohej të vaksinohej.
