- Sulmuesi Mariano Diaz nuk ka luajtur ende asnjë takim në këtë fillim sezoni me Real Madridin. Gjatë verës ai ishte një nga lojtarët që pritej të largohej nga “Los Blancos” por në fund drejtuesit nuk gjetën marrëveshje me asnjë klub tjetër. Përveç Romës që u përpoq disa herë të siguronte shërbimet e ish-sulmuesit të Lyon, një tjetër klub që dëshironte të afronte 26-vjeçarin ishte Schalke. Gjermanët duket se ende nuk kanë hequr dorë nga lojtari me origjinë nga Republika Domenikane dhe verën e ardhshme pritet të bëjnë sërish një tentativë serioze për ta transferuar sulmuesin në Gelsenkirchen.
- Drejtuesit e Atletico Madridit kanë nisur negociatat për të zgjatur dhe përmirësuar kontratën e mesfushorit Thomas Partey. 26-vjeçari po kalon një formë aktuale të shkëlqyer, duke qenë një titullar i padiskutueshëm në formacionin e Simeones deri në këtë fazë të sezonit, madje duke shënuar edhe dy gola. Marrëveshja aktuale e mesfushorit ganez përfundon në vitin 2023, ndërsa përmban edhe një klauzolë lirimi prej 50 milionë eurosh, me drejtuesit e Atleticos që synojnë dyfishimin e saj në 100 milionë euro. Sipas mediave, bisedimet mes palëve janë në fazë të avancuar dhe shumë shpejt 26-vjeçari pritet të hedhë firmën mbi kontratën e re.
- Drejtuesit e Tottenhamit po përgatiten që të largojnë disa lojtarë me hapjen e merkatos së janarit. Përveç Eric Dier apo Dany Rose, një emër me peshë që pritet të largohet nga “Spurs”-at është ai i mesfushorit danez, Christian Eriksen. 27-vjeçarit i përfundon kontrata qershorin e ardhshëm dhe për të mos e humbur me parametër zero, drejtuesit janë bindur që ta shesin atë me hapjen e merkatos së janarit. Eriksen është një nga objektivat e Real Madrid dhe kjo duket të jetë arsyeja se përse danezi nuk pranoi të rinovonte kontratën, edhe pse drejtuesit e Tottenham u përpoqën vazhdimisht ta bindnin atë.