Harry Kane është prioriteti kryesor i Manchester United në merkaton e verës. Sulmuesi anglez ka përfunduar tashmë në orbitën e “Djajve të Kuq”, që kërkojnë shërbimet e një golashënuesi të mirëfilltë, me largimin e Edinson Cavanit thuajse të sigurt në përfundim të sezonit.
Sipas ‘The Sun’, ish-shefi ekzektiv i Manchester United, Ed Woodward, e kishte pjesë të planeve të tij kapitenin e kombëtares së ‘Tre Luanëve’ në edicionin e kaluar, por transferimi i Jadon Sancho për 73 milionë paund limitoi buxhetin e merkatos verore. Ndërkohë, 20 herë kampionët kanë rizgjuar interesin e tyre dhe kësaj radhe nuk kanë asgjë për të humbur.
Ofensiva e United shpeshherë nuk ka qenë në lartësinë e duhur në këtë sezon, me peshën e sulmit që është përballuar në jo pak raste nga Cristiano Ronaldo, i cili i jep siguri skuadrës me eksperiencën e jashtëzakonshme si dhe me cilësitë për të zgjidhur i vetëm fatet e një ndeshje.
Por, nga ana tjetër portugezi mbushi 37 vjeç në Shkurt të këtij viti, që konsiderohet një penalitet për të nga ana fizike dhe një tregues se 5-herë fituesi i Topit të Artë nuk mund të jetë gjatë gjithë kohës në formacionin titullar.
Si rrjedhojë, përgjegjësia e sulmit duhet të ndahet me një nga lojtarët më të spikatur në Evrope përgjatë viteve të fundit që i ka edhe shifrat në favorin e tij. 28 vjeçari ka shënuar plot 178 herë për fanellën e Spurs, madje duke koleksionuar edhe 3 herë ‘Këpucën e Artë’ si golashënuesi më i mirë Premier League.
Harry Kane gëzon respekt të gjerë edhe nga mediat britanike që e admirojnë bomberin jo vetëm për kualitetet në fushë por edhe për lidershipin, një cilësi që e dëshmoi më së miri me përfaqësuesen e Anglisë në ‘Euro 2020’, ku i udhëhoqi drejt finales.
Gara për të siguruar firmën e Harry Kane në merkaton e verës pritet të ndizet maksimalisht pasi në lojë do të futet edhe Manchester City që gjithashtu kërkon të përforcojë repartin ofensiv.
[quiz-cat id=”297576″]
