Ekipi i Evropës arrin të fitojë Laver Cup për të dytin vit radhazi, kundër ekipi të Botës. Ndeshja vendimtare e këtij turneu miqësor ishte ajo mes Alexander Zverev e Kevin Anderson, ku gjermani Zverev mundi afrikano-jugorin me rezultatin 6-7 7-5 10-7.
Sukses para këtij takimi arriti dhe legjenda Roger Federer, i cili mundi amerikanin John Isner 6-7 7-6 10-7. I veçantë ishte fakti, se zvicerani luajti dhe rolin e trajnerit për Zverev në ndeshjen e fundit, e cila rezultoi të ishte vendimtare.
Ky ishte edicioni i dytë i Laver Cup, ku në vitin e kaluar ishte përsëri ekipi i përbërë nga lojtarë evropianë që arriti fitoren, të udhëhequr nga Federer e Rafa Nadal. Ky kompeticion u zhvillua në Chicago të Shteteve të Bashkuara, ndërkohë që vitin e kaluar ishte në Pragë të Republikës Çeke.
Shumë nga tenistët më të mirë në botë marrin pjesë në këtë turne. Këtë edicion, përfaqësuesit e ekipit të Evropës ishin Federer, Djokovic, Zverev, Dimitrov, Goffin dhe Edmund, ndërkohë që për ekipin e Botës luanin Anderson, Isner, Schwartzmann, Sock, Kyrgios e Tafoe. Rezultati i përgjithshëm u mbyll 13 me 8, ndërkohë që për gjatë tre ditëve rreth 93 mijë persona shijuan spektaklin e ofruar nga ky turne.