Anësori austriak Valentino Lazaro është bërë zyrtarisht një futbollist i Borussias së Monchengladbach-ut, pasi kaloi me sukses vizitat mjekësore dhe u vu në dispozicion të trajnerit për t’u përgatitur për sezonin e ri.
Futbollisti në pronësi të Interit u transferua te klubi gjerman me formulën e huazimit për 1.2 milionë euro dhe të drejtës së blerjes për 13.8 milionë euro, ndërsa zikaltrit kanë ruajtur edhe 15% të kartonit në rast të një rishitjeje të austriakut në të ardhmen.
Lazaro ishte blerja e parë e Interit pas emërimit të Antonio Contes në pankinë, por pas disa muajsh në klubin milanez, nuk arriti të bindë trajnerin për një vend në formacion dhe u huazua në janar te anglezët e Newcastle.
Megjithatë pas 8 muajsh në kampionatin anglez, Newcastle vendosi të mos ushtrojë të drejtën e blerjes dhe Lazaro zgjodhi të rikthehet në kampionatin gjerman, pasi ishte pjesë e Herthës së Berlinit para se të transferohej te Interi.