Juventusi ka nevojë për prurje nga merkatoja për të zgjidhur problemet e shumta në ekip. Drejtuesit kanë piketuar Sergej Milinkovic-Savic si përforcimin ideal në mesfushë, por arritja e një akordi me klubin e Lazios nuk do të jetë një mision i thjeshtë.
27-vjeçari serb po zhvillon paraqitje shumë të mira me skuadrën e Sarrit dhe deri në këtë fazë të sezonit numëron 4 gola dhe 7 asiste. Juventusi e ka kërkuar edhe më parë, ndërkohë që Claudio Lotito “shuan” shpresat e bardhezinjve për të mbërritur te lojtari dhe qetëson tifozët bardhekaltër.
“Nuk kam marrëveshje me Kezmanin (agjenti i mesfushorit) për ta shitur atë te Juventusi apo diku tjetër në dimër. Në të vërtetë, Milinkovic-Savic tani kushton 120 milionë euro, jo më 100. Çdo muaj çmimi i tij rritet”, deklaroi presidenti i Lazios për Il Messaggero.
Ndërkohë, klubi kryeqytetas ka rinovuar kontratën me Adam Marusic. Anësori i djathtë nga Mali i Zi, i cili është pjesë e Lazios prej vitit 2017, ka zgjatur me një vit kontratën dhe do të jetë mbajë veshur fanellën bardhekaltër deri në verën e vitit 2025.
