Lazio si një rul që shtyp çdo gjë që i del përpara. Formën e jashtëzakonshme që po kalon në Serinë A, ekipi bardhekaltër e konfirmoi edhe në sfidën e “Olimpicos” kundër Sampdorias, të cilën e ndëshkoi plot 5 herë, duke pësuar vetëm një gol në fund.
3 golat e parë skuadra e drejtuar nga Simone Inzaghi i realizoi brenda 20 minutave të para. Fillimisht e zhbllokoi rezultatin Caicedo (7’), ndërsa Immobile realizoi dy gola brenda 3 minutave (17’ dhe 20’), të parin me 11-metërsh.
Në epërsi të trefishtë, Lazio luajti lirshëm dhe nuk hoqi dorë nga sulmet edhe në pjesën e dytë, teksa e tundi edhe dy herë të tjera rrjetën me Bastos (55’) dhe sërish Immobilen me penallti (65’).
Sampdoria mundi ta realizonte golin e nderit me Linetty (74’), por vetëm një minutë më vonë skuadra gjenoveze mbeti me një lojtar më pak, pasi Chabot mori karton të kuq si rrjedhojë e një ndërhyrjeje të gabuar si lojtar i fundit.
Për Lazion kjo ishte fitorja e 11-të radhazi në Serinë A, sukses që e ngjit në kuotën e 45 pikëve, një më pak se Interi i vendit të dytë (luan këtë të diel ndaj Lecces në transfertë).