Skuderia e Ferrarit prezantoi së fundmi në Maranello modelin e ri SF-23, makina e cila në sezonin 2023 do të tentojë të rikthehet te titulli që italianëve iu mungon prej vitesh. I pari që e provoi ishte piloti kryesor Charles Leclerc, i cili pas kilometrave të parë nuk ngurroi të jepte edhe përshtypjet me punën e mekanikëve të Ferrarit.
Piloti monegask u shpreh se makina i dhuroi një ndjesi speciale ndërsa shtoi se është ende herët për të folur mbi detajet dhe pritshmëritë rreth së ardhmes.
“Mendoj se kilometrat e parë me makinën e projektit të ri ishin speciale. Gjithçka shkoi mirë, por sigurisht me vetëm dy xhiro është pak e vështirë për të dhënë detaje. Megjithatë, unë për më shumë fola me instruktorët. E rëndësishme është se makina të dhuronte një ndjesi të mirë dhe se gjithçka shkoi brenda pritshmërive”, u shpreh Leclerc.