Manchester United fitoi në transfertë me rezultatin 0-1 përballë Real Sociedad, në ndeshjen e vlefshme për Grupin E të Europa League. Megjithatë, trepikëshi nuk i mjaftoi “Djajve të Kuq” pasi ishin pikërisht spanjollët që e siguruan atë falë golavarazhit më të mirë. Në fakt, në fraksionin e dytë të lojës, trajneri i skuadrës angleze, Erik ten Hag provoi të ndryshonte fatet e takimit duke bërë një sërë zëvendësimesh, që në fund nuk rezultuan efikase.
Legjenda e United, Paul Scholes shprehu hapur zhgënjimin e tij me lëvizjet e Ten Hag, duke theksuar se bëri ndryshime duke nxjerrë lojtarët jashtë rolit me skuadrën që u duk sikur të ishte një ekip i kategorisë së dytë.
“Pjesa e dytë ishte pak e rrëmujshme dhe skuadra nuk kishte asnjë plan. Më dukej sikur taktika e vetme ishte të hidhej topi para dhe më pas të luftohej për ta rifituar sërish atë. Ishte një futboll që aplikohet në ligat inferiore, e bëjnë skuadrat e kategorisë së dytë. Nuk e kuptoj se çfarë kërkoi të bënte Ten Hag, lojtarët ishin jashtë roleve të tyre. Pjesa e dytë ishte një lëmsh i madh”, u shpreh Scholes.