Për herë të parë në histori PSG kualifikohet në finale të Champions League. Kampionët e Francës eliminuan me prepotencë në gjysmëfinale Leipzigun, të cilin e mposhtën thellë 3-0.
Dominim i dukshëm i ekipit të drejtuar nga Thomas Thuchel, falë “tredhëmbëshit” të frikshëm Mbappe-Neymar-Di Maria. Në fakt Mbappe dhe Neymar që përbëjnë “lokomotivën” e skuadrës, megjithëse nuk arritën të shënonin, ishin pa dyshim ndër më të mirët në fushë.
Takimi mori drejtim të pakthyeshëm që në minutën e 13-të, kur krosimi i Di Marias nga një goditje e lirë gjeti kokën e Maquinhos, i cili nuk i dha asnjë shans portierit kundërshtar. Golin e dytë PSG e realizoi në minutën e 42-të, kur pas një gabimi në pasim nga ana e portierit Gulacsi, Di Maria mori një asist përfekt nga Neymar dhe nga një distancë e afërt realizoi të dytin.
PSG mbylli llogaritë me Leipzigun në minutën e 56-të me Juan Bernat, që shënoi me kokë pas asistit të Di Marias. Një gol dhe dy pasime vendimtare për lojtarin argjentinas, praktikisht pjesëmarrës në të tre finalizimet e kampionëve të Francës, çka e bëjnë njeriun e ndeshjes.
PSG pret tashmë të mësojë skuadrën që do të ketë përballë në finale, e cila do të dalë nga dueli mes Bayernit të Mynihut dhe Lyonit.
