Përparim Daiu pritet që të jetë trajneri i përkohshëm i skuadrës së Egnatias, së paku për ndeshjen e javës së 11-të ndaj Tiranës. Presidenti Agim Demrozi i ka besuar drejtimin e përkohshëm të skuadrës rrogozhinase ish-trajnerit te Laçit, Shkumbinit, Tomorit dhe Besës. Daiu e njeh mirë skuadrën, për shkak se ka qenë pjesë e stafit teknik të klubit.
51-vjeçari nuk është angazhuar në futboll në rolin e trajnerit që nga viti 2013, kur u largua nga ekipi i Besës, por tani ka ardhur momenti për t’u ulur sërish në pankinë. Daiu do u japë mundësinë drejtuesve të klubit që të mendojnë me qetësi për të gjetur trajnerin për vazhdimësinë e sezonit.
Pak ditë më parë Egnatia largoi trajnerin Gugash Maganin, i cili u shkarkua pas humbjes në kampionat me Kukësin. Skuadra e Egnatias ka grumbulluar deri më tani 11 pikë duke u renditur në vendin e tetë në klasifikimin e Abissnet Superiores, ndërsa ka arritur që të marrë kualifikimin edhe për në fazën çerekfinale të Kupës së Shqipërisë, ku do të ndeshet me ekipin e Laçit.
