Granit Xhaka po kalon një formë fantastike me Arsenal, që prej kalim të tij në Premier League. Mesfushori me origjinë shqiptare deri më tani është aktivizuar në të gjitha ndeshjet, si në Premier League, po ashtu edhe në Europa League dhe vetëm në sfidën ndaj Bournemouth është zëvendësuar në minutën e 87.
29-vjeçari është pjesë e Arsenal që prej vitit 2016 ndërsa një nisje të tillë Xhaka nuk e ka në asnjë sezon me klubin londinez. Mesfushori ka kaluar vështirësi të shumta, fillimisht humbi shiritin e kapiteni, u përball me zemërimin e tifozëve, kurse tani ai ka kthyer përmbys çdo gjë, duke u shndërruar në liderin kryesor për Arsenal.
Deri më tani Xhaka ka shënuar një gol kundër Leicester dhe gjithashtu ka dhuruar tre asist.
Në sezonin e kaluar në 27 paraqitje Xhaka realizoi vetëm 1 gol dhe dhuroi 2 asist në Premier League, ndërsa performancën e sezonit të fundit mesfushori me origjinë shqiptare e ka kaluar për vetëm shtatë javë.
Fitorja e fundit në transfertë përball Brentford me rezultatin 3-0, ishte shumë e veçantë për shqiptarin , pasi gjatë gjithë ndeshjes mbajti shiritin e kapitenit për Arsenal, udhëhoqi ekipin si një lider i vërtet dhe në fund rifitoi përsëri zemrat e tifozëve, pasi të gjithë kënduan në kor emrin e tij.