Ndryshimi i drejtuesve në krye të FIFA-s dhe UEFA-s duket se ka sjellë një frymë të re në këto dy institucione, që gjatë kohëve të fundit kanë ndërmarrë disa iniciativa për ndryshimin e formateve klasike të kompeticioneve.
Pas zyrtarizimit të Ligës së Kombeve nga ana e UEFA-s, që është një prej risive më të mëdha të dekadave të fundit, një tjetër projekt po diskutohet në zyrat e dy institucioneve të mëdha të futbollit botëror, në mënyrë që ideja e Ligës së Kombeve të zgjerohet në rang global.
Për të kufizuar sa më shumë numrin e miqësoreve, edhe FIFA mendon të aplikojë një formulë të ngjashme. Për momentin, UEFA konfirmon nisjen e bisedimeve duke u mjaftuar me një qëndrim zyrtar deri diku të padeshifrushëm.
“Bisedimet janë në një pikë konstruktive”, thekson një burim zyrtar i UEFA-s për BBC-në, që shton gjithashtu se ende nuk është marrë një vendim përfundimtar.
Liga e Kombeve, edhe pse do të startojë vetëm në muajin shtator të vitit të ardhshëm, duket se është një ide që po gjen mbështetje të madhe, pasi mund të rezultojë e suksesshme. 55 kombëtaret, anëtare të UEFA-s, do të nisin kompeticionin e ri gjatë 2018-ës, me qëllim kualifikimin për në Euro 2020.