Çfarë gare për titullin kampion në IPKO Superligën e Kosovës. Një ditë pasi zbritën në fushë dy kryesuesit, Llapi përfitoi nga barazimi 1-1 i Prishtinës në fushën e Dritës, duke triumfuar thellë 4-1 me Trepçën ’89, rezultat që e ngjit skuadrën nga Podujeva në vendin e dytë, duke lënë pas në të njëjtën kuotë pikësh, Prishtinën.
Në stadiumin “Zahir Pajaziti” të Podujevës, takimi nisi keq për vendësit, që u ndëshkuan në minutën e 17-të nga Traore, gjithsesi skuadra e drejtuar nga Batatina përmbysi shifrat në 2-1 në pjesën e parë me gola të Januzit dhe Maliqit, në minutat shtesë, kur mitrovicasit po kërkonin të shmangnin humbjen, Januzi realizoi edhe dy gola të tjerë, duke marrë topin në shtëpi.
Dy ndeshjet e radhës, me Prishtinën në transfertë dhe Feronikelin në Podujevë, do të kenë përcaktuese për llapjanët për çështjene titullit.
Fitore minimale, por shumë e rëndësishme e Flamurtarit në fushën e Gjilanit. Goli i Kelmendit në pjesën e dytë e largoi ekipin kuqezi nga zona e barazhi.
0-3 fitoi Ballkani me KEK-un, me dygolësh të Topallit dhe finalizimin e Azdovic, ndërsa Ferizaj, me fitoren 3-1 ndaj Lirisë i fundosi në vendin e parafundit prizrenasit, që tashmë as matematika nuk i mban në elitë. Goli i Besenit të Lirisë u zhvlerësua nga finalizimet e Krasniqit, Gashit dhe Jonuzit.