Java e 26 e IPKO Superligës në Kosovë startoi sot me dy nga 6 takimet e planifikuara, ku Llapi e Drenica morën fitore në sfidat respektive ndaj Kek-ut dhe Trepçës ’89.
Skuadra nga Podujeva, e drejtuar nga Tahir Batatita, vuajti jo pak në transfertën ndaj Kek-ut të vendit të fundit dhe mori një 3-pikësh të vështirë, falë fitores 0-1.
Vendasit u mbrojtën mjaft mirë dhe lanë shumë pak hapësira shënimi për sulmuesit e llapit, por u ndëshkuan nga një autogol i pafat i Vitijas, në minutën e 72-të të ndeshjes.
Në sfidën tjetër, Drenica hodhi një hap të rëndësishëm drejt sigurimit të mbijetesës, pasi mposhti me rezultatin 2-0 një rival direkt si Trepça ’89.
Uka ishte heroi i fitores për Drenicën, pasi arriti të shënojë dy herë, konkretisht në minutat 10’ dhe 55’, duke u dhënë të tijve 3 pikët.
Renditja në IPKO Superliga kryesohet nga Feronikeli me 59 pikë, i ndjekur nga Llapi që ka marrë përkohësisht vendin e dytë me 57 pikë dhe më pas Prishtina me 56.
