Roma ka prezantuar pasditen e sotme mbrojtësin 22-vjeçar turk Mert Cetin, i cili vjen nga klubi i Genclerbirligi dhe pritet të mbushë boshllëkun e krijuar me largimin e mbrojtësit grek Kostas Manolas.
Verdhekuqtë ishin shumë pranë transferimit të kroatit Dejan Lovren dhe kishin arritur akordin edhe me Liverpoolin, por një bonus prej një milionë eurosh i kërkuar nga 29-vjeçari, bëri që marrëveshja të dështojë.
“Jam shumë i lumtur që kemi sjellë në skuadër Mert Cetin, një mbrojtësi i ri dhe me një të ardhme të ndritur përpara. Ndonëse 22-vjeçar, ai ka një eksperiencë të konsiderueshme dhe kam besim se do të fitojë shpejt zemrat e tifozërisë verdhekuqe”, tha Drejtori Sportiv i Romës, Petrachi.
Për kartonin e Cetin, verdhekuqtë paguan 3 milionë euro dhe morën përsipër t’u japin turqve edhe 10 % të vlerës në rast rishitjeje të futbollistit në ndonjë tjetër skuadër në të ardhmen.