Një ëndërr për një skuadër që vjen nga Kategoria e Parë. Objektivi i Bylisit të paktën duke i’u referuar fjalëve të tajnerit Dovedan mbetet qëndrimi në Superiore, por nuk ka kënaqësi më të madhe se sa të jesh në majën e renditjes dhe pse te mos bëhet gjithçka e mundur për të vijuar këtë rrugëtim aq sa koha do ta lejojë.
Ballshiotët duelin e radhës e kanë sërish në transfertë dhe kësaj radhe si kundërshtar kanë Luftëtarin. Humbjen nuk e kanë provuar më që pas javës së parë ndaj Teutës dhe kjo është një shenjë e qartë e karakterit dhe pse jo pasionit që po tregojnë futbollistët e skuadrës nga Mallakastra. Në Gjirokastër do të rikthehet Jurgen Goxha po ashtu ka gjasa që të zbresë në fushe dhe Turabov, megjithatë një mungesë e konsiderueshme është ajo e Ditmar Bicajt i cili u ndëshkua me kartonin e kuq në barazimin pa gola përballë Laçit.
Në krahun tjetër është një ekip që nuk fal asgjë edhe pse problematikat janë evidente tek Luftëtari. Paraqitjet e gjirokastritëve nuk ka qënë të gjitha për tu flakur tej, por në fund rëndësi kanë pikët dhe skuadra e Marantas ka gumbrulluar vetëm 5 pikë. Përvoja nuk është arma më e fortë, megjithatë freskia dhe dëshira e lojtarëve për t’u shfaqur në vitrinën e Superiores është aspekti më pozitiv i këtij Luftëtari.