Largimet e Vasil Shkurtajt dhe Eduart Rrocës kanë prishur planet e trajnerit të Luftëtarit Gentian Mezani, i cili është ende në pritje të një sulmuesi dhe një fantazisti. Edhe pse do të jetë e vështirë të gjenden lojtarë të nivelit të tyre, në Gjirokastër janë në pritje të “dhuratave” nga merkato, për të zëvendësuar të larguarit.
Emrat që do të vijnë sigurisht që kanë rëndësi, por mbi të gjitha duhen lojtarët e duhur për të mbuluar pozicionet e lëna vakant. Nëse kampionati do të niste në këto momente, atëherë alternativat janë në shtëpi, edhe pse jo shumë bindëse. Në majën e sulmit vlonjati Mezani pritet të aktivizojë Ismael Dungan, edhe pse keniani nuk ka bindur plotësisht për të merituar vendin e titullarit.
Autor i golit të fitores ndaj Tiranës, 25-vjeçari ka lënë për të dëshiruar në fazën përgatitore, duke shënuar vetëm një gol në miqësoren ndaj Orikut. Dy testet e janarit ndaj inferiorëve si Oriku dhe Bylis ishin mundësia e Dungës dhe e tërë skuadrës për të treguar veten, por keniani nuk ka bindur plotësisht. Ndërkohë në rolin e organizatorit pritet të aktivizohet Donald Rapo,që gjatë periudhës së tij të aktivizimit me fanellën zikaltër ka mbuluar disa role, si në mbrojtje, ashtu edhe në mesfushë.
Megjithatë këto nuk janë vendimet përfundimtare, pasi drejtuesit janë ende duke punuar në merkato për të afruar lojtarë cilësorë, që do të bënin diferencën. Për momentin, mësohet që klubi është në tratativa me dy futbollistë që do të zëvendësojnë të larguarit e janarit. Në Gjirokastër për momentin kanë edhe fatin kundër, pasi në miqësoren ndaj Bylisit u dëmtua edhe afrimi i fundit, Mërgim Neziri, me mbrojtësin që pritet të rikthehet në stërvitje nga fundi i javës së ardhshme.