Për Luftëtarin ky sezon nuk ka qenë i thjeshtë, pasi ishin mësuar të luajnë pa presionin e renditjes dhe këtë vit gjirokastritët kanë patur shpesh trysninë e rënies një kategori më poshtë.
Ndeshja me Tiranën do të jetë dhe një si një lloj finaleje për ta. Ahmataj, i mësuar me të tilla situata edhe në momentin që drejtoi Kamzën, i ka dhënë një lloj qetësie ekipit, që është pasqyruar dhe në javët e fundit.
Fakti që edhe dy rivalët e tjerë, Kamza e Kastrioti përballen me njëri-tjetrin, mund të jetë një plus më shumë për Luftëtarin, për të synuar maksimumin ndaj Tiranës, edhe pse në “Selman Stërmasi” nuk ia kanë dalë të triumfojnë edhe në ditët më të mira.
Gjithsesi te bluzinjtë e dinë mirë se kjo ndeshje mund të përcaktojë shumë për mbijetesën e tyre. Pozitiviteti që ekziston brenda grupit, falë dhe rezultateve, është një plus më shumë për gjirokastritët, në një situatë që ka ndryshuar pothuajse plotësisht humorin dhe që ndoshta mund të ndryshojë për mirë dhe renditjen, por për këtë duhet të flasë më parë fusha.
