3 ndeshje, 3 fitore për Luftëtarin në tokën sllovene. Bluzinjtë regjistruan një tjetër sukses në fazën përgatitore që po zhvillojnë në Slloveni teksa pasditen e sotme mposhtën me rezultatin 1-0 skuadrës e elitës së futbollit rumun F.C Voluntari. Një fitore e merituar për Luftëtarin që dominoi në lojë kundërshtarin dhe pas sukseseve 3-1 ndaj maqedonasve të Rabotnickit dhe 2-1 ndaj vendasve të Aluminuj, bluzinjtë morën një fitore pa pësuar gol duke konfirmuar se janë përmirësuar ndjeshëm edhe në mbrojtje. Golin e vetëm të sfidës e shënoi sulmuesi Mario Gurma në minutën e 77-të të sfidës. Sulmuesi 36-vjeçar, ka vetëm dy ditë që stërvitet me skuadrën, dhe është zgjedhur si një alternativë e Shkurtajt në qendër të sulmit.Suksesi ndaj skuadrës që e mbylli në vendin e 12-të sezonin e fundit të kampionatin rumun, është një tregues i qartë se trajneri slloven Milos Kostic po bën një punë të shkëlqyer dhe ka ndërtuar një grup solid ndërkohë që Luftëtari është gati për duelin e turit të parë kualifikues të Europa League ndaj letonezëve të Ventspils me bluzinjtë që sfidën e parë do ta luajnë në datën 12 korrik në transfertë.
