Pas evidentimit të talentëve si Kristal Abazaj, Dejvi Bregu dhe Eduart Rroca, Luftëtari ka nisur intensivisht punën për të ardhmen e skuadrës. Jo rastësisht dy goditjet e para në merkaton e Janarit lidhen me futbollistë të përspektivës.Vetëm në pak orë distancë nga zyrtarizimi i sulmuesit të Kombëtares së 19-vjeçarëve, Jurgers Liçkollari nga Pogradeci, në Gjirokastër u transferua një tjetër lojtar i ekipit kuqezi të drejtuar nga Erjon Bogdani. Bëhet fjalë për sulmuesin Kejdi Balla, i rritur te Akademia e Futbollit në kryeqytet dhe që pas përfaqësimit me Kombëtaren e 17-vjeçarëve, tashmë është pjesë e ekipit të 19-vjeçarëve.
Një sinjal që te Luftëtari po mendojnë seriozisht për lojtarët që në të ardhmen e afërt do të bëhen pasardhësit e yjeve të rinj, Abazaj, Bregu dhe Rroca, që me paraqitjet e tyre kanë tërhequr interesin e klubeve pretendente në Shqipëri, por edhe të skuadrave nga liga të ndryshme europiane.Shitja e lojtarëve duket e paevitueshme, për tu dhënë mundësi që ata të rriten në karrierën e tyre, por edhe për të siguruar të ardhura financiare për arkat e klubit. Çështja është nëse në Gjirokastër do të rezistojnë ti mbajnë yjet e tyre gjatë merkatos së janarit, ashtu si premtoi presidenti Tavo, apo nëse do të dorëzohen përballë ndonjë oferte të parezistueshme.
