Lushnja gjen trajnerin e ri. Drejtimi i stolit të skuadrës i është besuar Hysen Dedjas. Shkodrani ka arritur akordin me kryebashkiakun Fatos Tushe për të zëvendësuar në stol të larguarin Artan Bano.
57-vjeçari është zyrtarisht tekniku i ri i skuadrës, ndërsa prezantimi i tij do të bëhet paraditen e së martës, në praninë e drejtuesve të klubit. Hysen Dedja është një prej emrave të njohur të futbollit shqiptar, por që rikthehet në detyrë pas një mungese të gjatë në stol. Skuadra e fundit që ka drejtuar ka qenë Bylisi në sezonin 2008-2009.
Për trajnerin bëhet fjalë gjithashtu për rikthimin e tretë në krye të Lushnjës, skuadër të cilën e ka drejtuar në sezonin 1999-2000 dhe për herë të fundit në vitin 2001 në elitën e futbollit në vend.
Në karrierën e tij, Dedja ka drejtuar gjithashtu tre herë edhe Vllazninë, ndërsa ka punuar edhe në stolin e Teutës, Luftëtarit, Laçit, Erzenit dhe Egnatias.
Shkodrani do të debutojë në Gjirokastër, në duelin ku Lushnja do të përballet me Luftëtarin, ndeshje që mbyll edhe fazën e parë të Kategorisë Superiore. Përpara emërimit të Hysen Dedjas, skuadra regjistroi fitoren e parë në këtë sezon, duke kaluar 2-1 Teutën, në një përballje dramatike, që u vendos nga goli i kapitenit Sefa në kohën shtesë.
