Manchester United “hap” krahun në garën për titull. Tjetër hap fals i Djajëve të Kuq të cilët në javët e fundit kanë humbur shumë terren ndaj Manchester City-t kryesues dhe tashmë e shohin veten 7 pikë prapa me një ndeshje më shumë të luajtur. Skuadra e Solskjaer nuk shkoi më shumë se një barazim 1-1 në transfertën përballë West Bromwich Albion. Sulmuesi i ardhur në huazim nga Galatasaray-t në merkaton e dimrit, Mbaye Diagne kaloi në epërsi WBA-në pa u mbushur ende dy minuta lojë.
Por United arriti të gjente baraspeshën me Bruno Fernandes në minutën e 45-të me portugezin që realizoi një supergol. U duk sikur pjesa e dytë do të sillte edhe përmbysjen e skuadrës së Solskjaer por Manchester United, nuk arriti dot të shënonte edhe golin e dytë, duke u larguar vetëm me 1 pikë nga kjo transfertë. Ndërkohë që skuadra e Sam Allardyce mori një pikë të artë në garën për mbijetesë. Në ndeshjen tjetër të javës së 24-t atë mes Southampton dhe Wolves, u shënuan shifrat finale 1-2 me ujqërit që arritën të përmbysnin golin e realizuar nga Ings në pjesën e parë me finalizimet e dy portugezëve Neves dhe Neto.