Pas fitores me goleadë në Ligën e Kampionëve përballë Schalke 04, Manchester City ka vendosur të shpërblejë me rinovim, mesfushorin portugez Bernardo Silva.
Kështu pasditen e sotme klubi anglez ka njoftuar se kontrata e re me mesfushorin Bernardo Silva do të zgjasë deri në vitin 2025, pra për 6 sezonet e ardhshme.
Mesfushori ka luajtur 40 ndeshje deri në këtë pikë të sezonit aktual me Manchester City-n dhe ka arritur të shënojë edhe 9 gola, duke treguar një formë mjaft të mirë, ndërsa janë përmirësuar edhe përfitimet e tij ekonomike në kontratën e re.
“Jam shumë i lumtur që jam pjesë e Manchester City-t. Luaj për një klub ideal për të realizuar ambiciet e mia dhe jam i vlerësuar që mu ofrua zgjatja e kontratës”, tha portugezi.
Bernardo Silva iu bashkua Manchester City-t në verën e 2017-ës, pasi klubi anglez pagoi plot 50 milionë euro në arkat e Monacos.