Manchester United e nis me blof sezonin në Premier Legaue. “Djajtë e Kuq” u turpëruan 1-3 në “Old Trafford” nga Crystal Palace në sfidën e vlefshme për javën e dytë, duke hedhur dyshime të forta për forcën që do të ketë skuadra e drejtuar nga Ole Gunnar Solskjaer në garën për titullin kampion përballë Liverpoolit, City-t, Chelsea-t dhe Arsenalit.
E vetmja notë pozitive për United ishte debutimi me gol i holandezit Donny van de Beek, i cili u hodh në fushë në minutën e 67-të në vend të Pogbasë dhe pas vetëm 13 minutave në fushë tundi rrjetën.
Futbollistët miq, të drejtuar nga një ekspert si Roy Hodgson, i befasuan “Djajtë e Kuq” që në minutën e 7-të me golin e Townsend. Reagimi i futbollistëve të United nuk ishte i mjaftueshëm për të ndryshuar rrjedhën e ndeshjes. Në minutë minutën e 72-të Ayew humbi një 11-metërsh për Crystal Palace, por vendësit nuk e kthyen në avantazh psikologjik këtë episod, përkundrazi vetëm pak minuta më pas u ndëshkuan nga një ish si Zaha, që këtë radhë e ktheu në gol penalltinë e dytë të fituar nga miqtë.
Goli i holandezit van de Beek dha përshtypjen e rremë se Manchester United mund të bënte përmbysjen e madhe por nuk ndodhi kështu, sepse Zaha gjeti golin e dytë personal, atë të rezultatit përfundimtar 1-3 në minutën e 85-të.
Probleme të mëdha për Manchester United si në mbrojtje dhe në sulm. Solskjaer duhet të ndërhyjë menjëherë, ndryshe do të ketë surpriza të tjerë të pakëndshme.
