Italia triumfoi me rezultatin e thellë 0-3 në Athinë përballë Greqisë, ndërsa nesër në mbrëmje do të përballet me Bosnjën, në ndeshjen e radhës eliminatore të Euro 2020-ës.
Trajneri Roberto Mancini, nga konferenca për shtyp para ndeshjes, deklaroi se do të ndryshojë shumë pak nga formacioni i Athinës, ndërsa foli edhe për mungesën e golave të sulmuesve.
“Zhvilluam një ndeshje të mirë, por tani na duhen golat e sulmuesve. Megjithatë nuk jam i shqetësuar, pasi herët a vonë, do fillojnë të shënojnë edhe ata. Me rëndësi është që të vazhdojmë të luajmë mirë”, deklaroi Mancini.
Antonio Conte u rikthye të trajnojë në Itali, duke pranuar stolin e Interit, ndërsa shumë shpejt pritet edhe rikthimi i Sarrit, këtë herë në pankinën e Juventusit, gjë që Mancini e vlerëson si tejet pozitive për futbollin në vend.
“Për atë që mësojnë në Koverciano, trajnerët italianë janë nga më të mirët taktikisht, ndaj rikthimi i tyre në vend, është gjithmonë një vlerë e shtuar për futbollin tonë dhe për përfaqësuesen”, tha Roberto Mancini.