Që nga kohët e Juventusit, Giuseppe Marotta është një adhurues i mesfushorit të Lazios, Sergei Milinkoviç-Saviç dhe sipas mediave italiane, do të provojë deri në fund të merkatos, të marrë serbin në skuadrën zikaltër.
Aktualisht zikaltërit janë përqendruar te merkatoja në dalje, teksa shpresat ishin që të shitej Icardi dhe paratë e tij të investoheshin për Milinkoviç-Saviç, por duket se tani Marotta ka edhe një plan B.
Bëhet fjalë për përfshirjen e dy futbollistëve si Matteo Politano dhe Roberto Gagliardini, në ofertën që do t’i bëhet Lazios për mesfushorin serb, ku ndër të tjera do të ofrohet edhe një shumë prej rreth 30 milionë eurosh.
Të dy futbollistët pëlqehen shumë nga Lotitto dhe Inzaghi, por presidenti i Lazios fillimisht mendon të presë, pasi do të preferonte të arkëtonte para kesh, në këmbim të Milinkoviç-Saviç.
Nga ana tjetër, nëse Marotta ia del të vërë serbin nën urdhrat e Contes, do t’i shtonte skuadrës forcë fizike dhe teknike dhe do të ngrinte ndjeshëm pretendimet e ekipit, për sezonin në vijim.