Deri para pak ditëve, e ardhmja e Paulo Dybalës ishte një nga temat më të diskutuara në botën e futbollit teksa për argjentinasin kishte disa ekipe të interesuara nga Serie A. Në fund, La Joya preferoi të bashkohej me Jose Mourinhon te Roma ndërsa u duk se te Interi mbetën të zhgënjyer duke qenë se tratativat me ish-lojtarin e Juventusit i kishin nisur prej kohësh.
Gjithsesi, rreth parapaskenave të transferimit të Dybalës në Milano, ka folur drejtori sportiv i zikaltërve, Beppe Marotta. Ky i fundit thekson se tek Inter nuk kishte hapësira për sulmuesin ndërsa shton se media “ndihmoi” në zmadhimin e temës “Dybala”.
“Te Inter nuk kishte hapësira për Dybalën, por kjo jo sepse ai nuk është një lojtar i zoti. Por, sepse ne nuk ia kishim shumë nevojën në këto momente. Më pas edhe media bëri të sajën duke e zmadhuar çështjen dhe në këtë formë u duk sikur Inter bëri një figurë të shëmtuar”, nënvizoi Marotta.