Goli i Anthony Martial ndaj Newcastle do t’i kushtojë Manchester United 8.7 milionë paundë (10 milionë euro). Kjo, për shkak të një klauzole, që “Djajtë e Kuq” e kanë pranuar si taksative karshi Monacos, për të nënshkruar me lojtarin francez.
Sipas mediave britanike, klubi nga “Old Trafford” do të duhet të paguajë shtesën prej 10 milionë eurosh, përveç 41 milionëve të depozituar në kohën e nënshkrimit të tij, sepse Martial ka arritur kuotën e 25 golave para vitit 2019. Kontrata përfshin dy klauzola për klubin e Manchester-it.
Ky i fundit do të duhet të paguajë 10 milionë euro të tjera, nëse Martial grumbullohet 25 herë me kombëtaren franceze dhe nominohet për “Topin e Artë” para vitit të ardhshëm. Deri më sot, Martial ka 18 paraqitje me Francën, kështu që ai mund t’i arrijë 25 të tilla në momentin e përcaktuar në kontratë.