Nemanja Matic është një prej lojtarëve të Manchester United të cilëve iu mbaron kontrata në fundin e këtij sezoni, çka do të thotë se ai mund të largohet si lojtar i lirë. Për momentin, mesfushori serb nuk duket i kënaqur me minutat e dhëna nga trajneri Solskjaer, ndaj dhe mundësitë që ai të rinovojë kontratën duken të pakta.
Duke parë situatën, disa klube, mes të cilave edhe Milani, Juventusi apo Dortmundi, janë hedhur në sulm për të arritur një marrëveshje verbale me mesfushorin, në mënyrë që më pas të nënshkruajnë me 31-vjeçarin kur kontrata e tij me “Djajtë e Kuq” të përfundojë.
Matic u transferua te Manchester United në vitin 2017 nga Chelsea, duke qenë një pikë kyçe në formacion gjatë kohës kur “Djajtë e Kuq” drejtoheshin nga Jose Mourinho.